पुणे : मुंबई इंडियन्स आजचा सामना जिंकेल, असे वाटत होते. पण जिंकता जिंकता पुन्हा एकदा मुंबईचा संघ पराभूत झाला. मुंबईचा हा या हंगामातील सलग पाचवा पराभव ठरला आहे. यापूर्वी २०१४ सालीदेखील मुंबईला सलग पाच पराभव पत्करावे लागले होते. या सामन्यात पंजाबने मुंबईपुढो विजयासाठी १९९ धावांचे आव्हान ठेवले होते. मुंबईच्या फलंदाजांनी यावेळी फटकेबाजी केली खरी, पण त्यांना विजय मात्र मिळवता आला नाही. मुंबईवर याेळी पंजाबने १२ धावांनी विजय साकारला. पंजाबच्या १९९ धावांचा पाठलाग करताना रोहित शर्माने झोकात सुरुवात केली, पण त्याला मोठी खेळी साकारता आली नाही. रोहित शर्माच्या रुपात मुंबई इंडियन्सला मोठा धक्का बसला. रोहितने यावेळी १७ चेंडूंत तीन चौकार आणि दोन षटकारांच्या जोरावर २८ धावा केल्या. रोहित शर्मापाठोपाठ इशान किशनही पुढच्याच षटकात आऊट झाला आणि मुंबईच्या संघाला दुसरा धक्का बसला. इशानला यावेळी फक्त तीनच धावा करता आल्या. रोहित आणि इशान बाद झाल्यावर डेव्हाल्ड ब्रेव्हिस आणि तिलक वर्मा यांनी मुंबईचा डाव सावरला. मुंबईसाठी धडाकेबाज फलंदाजी करणारा डेव्हाल्ड ब्रेव्हिस यावेळी ४९ धावांवर बाद झाला, यामध्ये चार चौकार आणि पाच षटकारांचा समावेश होता. तिलक वर्माने मुंबईचा डाव सारवण्याचा प्रयत्न केला, पण त्याला मोठी खेळी साकारता आली नाही. तिलक यावेळी ३६ धावांवर आऊट झाला. कायरन पोलार्डच्या रुपात मुंबई इंडियन्सला मोठा धक्का बसला. पोलार्डने धावचीत होत यावेळी आत्मघात केला. पोलार्डला यावेळी १० धावांवरच समाधान मानावे लागले. तत्पूर्वी, जाबचा कर्णधार मयांक अगरवाल आणि शिखर धवन यांनी मुंबईला पहिल्या पॉवर प्लेमध्ये विकेट मिळवण्याची कोणतीही संधी दिला नाही. धवनपेक्षा मयांक यावेळी चांगलीच आक्रमक फटकेबाजी करत असल्याचे पाहायला मिळाले. कारण पहिल्या पॉवर प्लेमध्येच मयांकने सहा चौकार आणि एक षटकार वसूल केला होता. मुंबईच्या संघाला सुरुवातीला चांगली कामगिरी करता आली नाही आणि एक नकोसा विक्रम त्यांच्या नावावर झाला आहे. पुण्याच्या मैदानात आतापर्यंत पॉवर प्लेमध्ये मुंबईने या हंगामात सर्वात जास्त धावा दिल्या आहेत. पंजाबने यावेळी पहिल्या पॉवर प्लेमध्ये बिनबाद ६५ अशी मजल मारली. पण मयांकला यावेळी मोठी खेळी साकारता आली नाही. पंजाबाचा कर्णधार मयांक अगरवालला बाद करत मुंबई इंडियन्सने मोठे यश मिळवले आहे. मयांकने यावेळी ३२ चेंडूंत सहा चौकार आणि दोन षटकारांच्या जोरावर ५२ धावांची खेळी साकारली. पंजाबच्या जॉनी बेअरस्टोला बाद करत मुंबईने दुसरे यश मिळवले. जयदेव उनाडकटने जॉनीला यावेळी १२ धावांवर बाद केले. त्यानंतर मुंबईचा वेगवान गोलंदाज जसप्रीत बुमराने यावेळी संघाला तिसरे यश मिळवून दिले. बुमराने धडाकेबाज फलंदाज लायम लिव्हिंगस्टोनला दोन धावांवर बाद केले. पण त्यानंतर शिखर धवन हा खेळपट्टीवर पाय रोवून उभा होता. धवनने यावेळी आपले अर्धशतकही साजरे केले. धवनने यावेळी ५० षटकांत पाच चौकार आणि तीन षटकारांच्या जोरावर ७० धावांची दमदार खेळी साकारली. त्यामुळेच पंजाबच्या संघाला मुंबईपुढे १९९ धावांचे आव्हान ठेवता आले.
from Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times https://ift.tt/Ya3PdVh
via IFTTT
