मुंबई : करोनाच्या काळात आपण सर्वांनीच मास्क लावले होते. पण आयपीएलमधील कोणताही खेळाडू चेहऱ्याला मास्क लावून खेळत असल्याचे आतापर्यंत पाहायला मिळाले नव्हते. कोणताही खेळाडू जेव्हा मैदानात सध्या उतरतो तेव्हा तो बायो बबलमध्ये असतो, त्यामुळे कोणत्याही खेळाडूला मास्क लावावा लागत नाही. पण पंजाब किंग्सचा वेगवान गोलंदाज रिषी धवन हा चेन्नई सुपर किंग्सविरुद्धच्या सामन्यात मात्र चेहऱ्याला मास्क लावून गोलंदजी करत असल्याचे पाहायला मिळाले. धवनने या सामन्यात चेहऱ्याला मास्क का लावला होता, याचे कारणही आता समोर आले आहे. धवनने चेहऱ्याला मास्क का लावला, जाणून घ्या...पंजाब किंग्स आणि चेन्नई सुपर किंग्स यांच्यातील सामना चांगलाच रंगतदार अवस्थेत होता. त्यावेळी पंजाबचा कर्णधार मयांक अगरवालने धवनच्या हाती चेंडू सुपूर्द केला. धवन जेव्हा गोलंदाजी करण्यासाठी आला तेव्हा बऱ्याच जणांना धक्का बसला. कारण धवन यावेळी चेहऱ्याला मास्क लावून गोलंदाजी करत असल्याचे पाहायला मिळाले. बाकीचे कोणतेही खेळाडू बायो बबलमध्ये असल्यामुळे मास्क लावत नाहीत, पण मग धवनलाच का मास्क लावण्याची गरज पडली, असा प्रश्नही सर्वांना पडला होता. या प्रश्नाचे उत्तर आता मिळाले आहे. बास्केटबॉल खेळामध्ये असा प्रकारचा मास्क लावला जातो. जेव्हा एनबीएच्या बास्केटबॉल स्पर्धेत एखाद्या खेळाडूच्या नाकाला दुखापत होते, तेव्हा तो अशा प्रकारचा मास्कर वापरत असल्याचे एक कारण समोर आले आहे. धवनच्या नाकालाही दुखापत झालेली होती. पंजाबचा संघ जेव्हा सराव करत होता तेव्हा धवनच्या नाकाला चेंडू लागला होता आणि त्याच्या नाकाला दुखापत झाली होती. त्यानंतर एक शस्त्रक्रीयाही त्याच्यावर झाल्याचे म्हटले जात आहे. त्यामुळे खबरदारीचा उपाय म्हणून या सामन्यात धवनने हा मास्क घातल्याचे म्हटले जात आहे. धवन या सामन्यात मास्क लावून खेळत असला तरी त्याच्या कामगिरीवर कोणताही परीणाम झाला नाही. धवनने यावेळी चेन्नईचा धडाकेबाज फलंदाज शिवम दुबेला त्रिफळाचीत केले आणि पंजाबच्या संघाला मोठे यशही मिळवून दिले.
from Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times https://ift.tt/Ao98ZRJ
via IFTTT
